سنجے دت اپنی سزا مکمل کرنے کے بعد رہا

ممبئی: ناجائز اسلحہ رکھنے پر سزا کاٹنے والے سنجے دت جیل سے رہا ہونے کے بعد اپنے گھر پہنچ گئے ہیں۔ 

بھارتی میڈیا کے مطابق سنجے دت پونا کی يرواڈا جیل میں اپنی سزا مکمل کرنے کے بعد رہا کردیئے گئے۔ رہائی کے موقع پر انہیں لینے ان کی بیوی مانیتا، ان کے بچے، بہنیں اور قریبی دوست راج کمار ہیرانی سمیت کئی افراد پہنچے تھے۔

رہائی کے بعد میڈیا سے اپنی مختصر بات چیت میں سنجے دت نے کہا کہ وہ آج بہت خوش ہیں کیونکہ وہ آزاد ہوگئے ہیں لیکن آزادی کا یہ سفر بہت مشکل تھا۔ یہ میرے گھر والوں اور مداحوں ہی کی بدولت ہے کہ وہ آج یہاں ہیں۔ سنجے دت اپنے گھر والوں اور دوستوں کے ہمراہ خصوصی پرواز سے ممبئی پہنچے ہیں، وہ آج اپنی والدہ نرگس کی قبر پر حاضری بھی دیں گے۔

بھارتی فلم نگری سے تعلق رکھنے والے ان کے دوستوں نے سنجے دت کے لئے نیک خواہشوں کا اظہار کیا ہے، ہدایت کار سبھہاش گھئی کا کہنا ہے کہ وہ سنجے دت کو ’’فلم ودھاتا‘‘ اور ’’کھل نائیک‘‘ سے جانتے ہیں کیونکہ ہر انہوں نے پہلے سے بہترین انداز میں واپسی کی ہے۔

مہیش بھٹ نے سماجی رابطے کی ویب سائیٹ پر اپنے پیغام میں کہا ہے کہ انہیں امید ہے کہ سنجے دت جیل سے مزید مضبوط انسان بن کر واپس آیا ہے۔