بڈھ بیر حملے میں شہید ہونے والوں کی نماز جنازہ ادا کردی گئی

پشاور: بڈھ بیر ایئرفورس بیس پر دہشت گردوں کے حملے کے نتیجے میں شہید ہونے والوں کی نمازہ جنازہ ادا کردی گئی جس میں وزیراعظم، آرمی چیف، ایئرچیف، وزیردفاع اور وزیراطلاعات سمیت دیگر افراد نے شرکت کی۔

 بڈھ بیر حملے میں شہید ہونے والے کیپٹن اسفند، پاک فضائیہ کے 3 جونیئر ٹیکنیشن اور 16 نمازیوں کی نماز جنازہ ادا کردی گئی۔ نمازہ جنازہ پورے فوجی اعزاز کے ساتھ ادا کی گئی جس میں وزیراعظم نوازشریف، آرمی چیف جنرل راحیل شریف، ایئرچیف سہیل امان، وزیردفاع خواجہ آصف، وزیراطلاعات پرویز رشید، وزیراعلیٰ خیبرپختونخوا پرویز خٹک سمیت شہدا کے لواحقین نے شرکت کی۔

اس سے قبل وزیراعظم نواز شریف نے کور ہیڈ کوارٹر پشاور کا دورہ کیا جہاں کور کمانڈر پشاور لیفٹیننٹ جنرل ہدایت الرحمان نے انہیں پشاور میں ایئربیس پر ہونے والے دہشت گرد حملے کے حوالے سے بریفنگ دی۔ اس موقع پر آرمی چیف جنرل راحیل شریف بھی موجود تھے۔

واضح رہے بڈھ بیر میں ایئرفورس بیس پر دہشت گردوں کی جانب سے حملے کے نتیجے میں کیپٹن اسفند، پاک فضائیہ کے 3 جونیرٹیکنیشن سمیت 29 نمازی شہید ہوئے جب کہ جوابی کارروائی میں 13 دہشت گرد مارے گئے تھے۔