انگلینڈ سیریز کے بعد مستقبل کا فیصلہ کرونگا، مصباح

اسلام آباد: قومی ٹیسٹ ٹیم کے کپتان مصباح الحق نے کہا ہے کہ ابھی کرکٹ سے ریٹائرمنٹ کیلئے وقت مقرر نہیں کیا اور وہ انگلینڈ کے خلاف سیریز کے بعد اپنے مستقبل کے حوالے سے نظرثانی کریں گے۔58 ٹیسٹ اور 162 ایک روزہ میچوں میں پاکستان کی نمائندگی اور 2010 سے قومی ٹیم کی قیادت کرنے والے مصباح الحق نے اس سے قبل کہا تھا کہ وہ پاکستان اور ہدنوستان کے درمیان مجوزہ سیریز کے بعد کرکٹ سے ریٹائرمنٹ کے خواہاں ہیں۔41 سالہ ٹیسٹ کپتان نے کہا کہ ابھی میرا ریٹائرمنٹ کا کوئی ارادہ نہیں لیکن انگلینڈ کے خلاف سیریز کے بعد اپنے مستقبل پر نظرثانی کروں گا، قومی ٹیم کی قیادت ایک چیلنج ہے اور کھلاڑی بحیثیت یونٹ اچھی کارکردگی دکھا رہے ہیں، یہی وجہ ہے کہ 2009 سے اپنی سرزمین پر نہ کھیلنے کے باوجود ہم نے قابل ذکر فتوحات حاصل کیں۔مصباح نے انگلینڈ کے خلاف سیریز کو ایک چیلنج قرار دیتے ہوئے کہا کہ ہم انہی وکٹوں پر کھیلیں گے جن سے ہم آہنگ ہیں لیکن اس کے باوجود انگلینڈ کے خلاف سیریز ایک چیلنج ہو گی۔یاد رہے کہ پاکستان نے اس سے قبل 2012 میں انگلینڈ کی ٹیم کا سامنا کیا تھا تو اس وقت انگلش ٹیم عالمی درجہ بندی میں پہلے نمبر پر براجمان تھی لیکن سعید اجمل اور عبدالرحمان کی شاندار اسپن باؤلنگ کی بدولت پاکستان نے عالمی نمبر ایک ٹیم کے خلاف تاریخی کلین سوئپ کیا تھا لیکن اس کے باوجود مصباح کا کہنا ہے کہ اس کامیابی سے موجودہ سیریز پر کوئی فرق نہیں پڑے گا۔انہوں نے کہا کہ میرا نہیں خیال کہ 2012 کی سیریز کے نتیجے سے کوئی فرق پڑے گا کیونکہ انگلینڈ کی ٹیم میں اب نئے کھلاڑی ہیں انہوں نے حال ہی میں ایشز سیریز بھی جیتی ہے۔مصباح نے کہا کہ پاکستان نے ٹیسٹ میچز میں انتہائی شاندار کارکردگی کا مظاہرہ کیا ہے اور کارکردگی میں اس تسلسل کا تمام تر سہرا کھلاڑیوں کو جاتا ہے۔انہوں نے گزشتہ آسٹریلیا کے خلاف گزشتہ سال ٹیسٹ کرکٹ کی تیز ترین سنچری کا ریکارڈ برابر کرنے کو اپنی زندگی کی سب سے یادگار اننگ قرار دیتے ہوئے کہا کہ وہ آج بھی اس کو کافی انجوائے کرتے ہیں۔