ایران کے 2 سالہ ننھے جمناسٹک ماسٹر نے سب کو حیران کردیا

تہران: کچھ لوگوں میں لوگوں کو حیران کردینے والی صلاحتیں بچپن سے ہوتی ہیں جنہیں صرف سامنے لانے کی ضرورت ہوتی ہے ایسا ہی ایک ایرانی بچہ صرف 2 سال کی عمر میں لوگوں کو حیران کردینے والے جمناسٹک کرتب دکھا رہا ہے۔

سماجی رابطوں کی ویب سائٹ فیس بک پر اس 2 سالہ ایرانی بچے کے کرتب سے بھرپور ویڈیو نے لوگوں کو اپنے سحر میں جکڑ رکھا ہے اور لوگ حیرت سے اسے دیکھ رہے ہیں۔ ایران کی سرزمین پر جنم لینے والے ایرات حسینی اپنی عمر کے 9 ماہ سے ہی یہ حیران کن کرتب دکھا رہا ہے اور اس کے لیے وہ خوب پریکٹس بھی کرتا ہے۔ ایرات کے والدین کا کہنا ہے کہ وہ اس شاندار کرتب کے لیے پروفیشنل ٹریننگ نہیں کرتا بلکہ گھر پر ہی روزانہ 10 سے 20 منٹ کی پریکٹس کرتا ہے جب کہ اس کا سب سے پسندیدہ کرتب مشکل ترین جمانسٹک ٹیکنیک سمر سالٹ ہے جسے وہ آسانی انجام دیتا ہے۔ ان کا کہنا ہے کہ ایرات یوگا بھی کرتا ہے اسی لیے وہ بیلینسگ اسلیٹس، بیک ورڈز واک اوور اور سمر سالٹ میں بڑی مہارت رکھتا ہے۔

دلچسپ بات یہ ہے کہ ایرات کے اکثر کرتب گھر میں ایسے جگہوں پر نظر آتے ہیں جہاں عام طور پر توازن قائم رکھنا مشکل ہوتا ہے۔ ایرات باورچی خانے کی چکنی سلیب پر پش اپ، ٹیلی ویژن اور سیڑھیوں پر توازن قائم کرتا اوردیواریں چڑھتا نظرآتا ہے جب کہ ایک ویڈیو میں تو وہ 6.5 کلو گرام وزن اپنی کمر پر رکھ کر پش اپ لگا رہا ہے جسے دیکھ کر لوگ اپنا سانس روکنے پر مجبور ہوگئے۔