جیل میں نیلسن منڈیلا سے متاثر تھا ، آصف

اسپاٹ فکسنگ اسکینڈل میں ملوث فاسٹ باؤلر محمد آصف نے انکشاف کیا ہے کہ وہ برطانیہ کی جیل میں گزارے گئے وقت کے دوران نیلسن منڈیلا سے متاثر ہوئے۔محمد آصف نے دی ٹیلی گراف کو اپنے انٹرویو میں کہا، "میری زندگی کے گذشتہ 5 برس بہت مشکل اور تلخ تھے، سب سے اذیت ناک یہ تھا کہ میں اُن گراؤنڈز میں داخل نہیں ہوسکتا تھا جہاں میں نے پوری زندگی کرکٹ کھیلی اور جس کا مجھے جنون کی حد تک شوق ہے، میرے خاندان والوں نے اس مشکل وقت میں میرا بہت ساتھ دیا، خاص کر اُس وقت جب میں برطانیہ کی جیل میں قید تھا"۔32 سالہ فاسٹ باؤلر جو پاکستان کے لیے 23 ٹیسٹ اور 38 ون ڈے میچز کھیل چکے ہیں، کا کہنا تھا کہ جیل میں انھیں سلمان کی صورت میں ایک ساتھی ملا لیکن جنوبی افریقا کے رہنما نیلسن منڈیلا کی زندگی ان کے لیے حوصلہ افزائی کا باعث بنی."میں نے یہ کبھی نہیں سوچا تھا کہ ایک دن میں جیل میں ہوں گا، میں بس اپنی زندگی کے اُس مشکل وقت کو ختم کرکے آگے بڑھنا چاہتا تھا، نیلسن منڈیلا نے بھی جیل میں مشکل وقت گزارا اور وہ اُس دور سے نکل آئے، یہی وجہ ہے کہ جیل میں گزارے گئے وقت کے دوران میں اُن سے متاثر ہوا"۔سن 2010 میں لارڈز کے تاریخی میدان میں کھیلے گئے ٹیسٹ میچ میں پیسوں کے عوض جان بوجھ کر نوبال کرنے پر انٹرنیشنل کرکٹ کونسل نے پانچ فروری 2011 کو سلمان بٹ، محمد آصف اور محمد عامر پر کرکٹ کھیلنے پر پابندی عائد کر دی تھی۔تینوں کھلاڑیوں پر جرم ثابت ہونے پر انہیں جیل بھیجنے کے ساتھ ساتھ سلمان بٹ کو 10 سال، محمد آصف کو 7 سال اور محمد عامر کو 5 سال سزا سنائی گئی تھی۔تاہم کرکٹ کی عالمی گورننگ باڈی نے گذشتہ ماہ ان تینوں کھلاڑیوں پر عائد پابندی یکم ستمبر 2015 کو رات 12 بجے ختم کرنے کا اعلان کیا تھا۔بیان میں کہا گیا کہ یہ تینوں کھلاڑی آئی سی سی اینٹی کرپشن ٹریبونل کے ضابطوں پر عمل درآمد کر کے 2 ستمبر 2015 سے ڈومیسٹک اور انٹرنیشنل کرکٹ کھیلنے کے اہل ہوں گے۔انٹرویو کے دوران محمد آصف کا کہنا تھا، "میں اب بالکل فٹ ہوں اور اُسی پوزیشن پر ہوں، جس پر 5 سال قبل پابندی لگنے سے پہلے تھا، ذہنی طور پر بھی میں کرکٹ میں واپسی کے لیے تیار ہوں لیکن مجھے حقییقت پسند ہوکر مناسب قدم اٹھانا ہوگا"۔آصف کا کہنا تھا، "حقیقیت میں میرا ٹارگٹ اگلے برس انگلینڈ میں ہونے والی سیریز کے ذریعے انٹرنیشنل کرکٹ میں واپسی ہے اور میں نے اپنے لیے یہ ہدف مقرر کررکھا ہے۔انگلینڈ اگلے برس 4 ہوم ٹیسٹ میچوں، 5 ون ڈے اور ایک ٹی ٹوئنٹی میچ میں پاکستان کی میزبانی کرے گا، یہ ٹیسٹ میچز لارڈز، مانچسٹر،برمنگھم اور اوول میں کھیلے جائیں گے۔