عالمی کرکٹ سے ریٹائرمنٹ کا ارادہ نہیں، اجمل

مایہ ناز پاکستانی اسپنر سعید اجمل نے خراب فارم اور سری لنکا کے خلاف سیریز کیلئے سلیکٹرز کی جانب سے نظر انداز کیے جانے کے باوجود کرکٹ سے ریٹائرمنٹ کی خبروں کو بے بنیاد قرار دیا ہے۔

پریس ٹرسٹ آف انڈیا کی رپورٹ میں دعویٰ کیا گیا کہ اجمل اپنی فارم اور نئے باؤلنگ ایکشن سے ناکامی پر دلبرداشتہ اور مایوس ہیں اور ریٹائرمنٹ کے حوالے سے غور کر رہے ہیں۔

تاہم اس رپورٹ کے جواب میں ڈان سے گفتگو میں اسپنر نے افواہوں کو مسترد کرتے ہوئے کہا کہ میں اپنی کارکردگی میں بتدریج بہتری کی وجہ سے مکمل پراعتماد اور واپسی کیلئے پرعزم ہوں۔

37 سالہ سعید اجمل نے ڈان کو مزید بتایا کہ میں ایک فائٹر ہوں اور ٹیم میں اپنی جگہ کے حصول کے لیے محنت جاری رکھوں گا، ابھی میں انٹرنیشنل کرکٹ سے ریٹائر نہیں ہو رہا۔

35 ٹیسٹ اور 113 ایک روزہ میچ کھیلنے والے اسپنر کے منیجر نے واضح کیا کہ اجمل کی ریٹائرمنٹ کے حوالے سے تمام تر خبریں بے بنیاد ہیں۔

اجمل کے منیجر مغیث شیخ نے کہا کہ اس طرح کی تمام رپورٹس سراسر غلط ہیں۔

اگست 2014 میں اسپنر کا باؤلنگ ایکشن مشکوک قرار پانے پر انٹرنیشنل کرکٹ کونسل نے ان پر پابندی عائد کردی تھی لیکن پھر رواں سال فروری میں انہیں باؤلنگ کیلئے کلیئر کردیا گیا تھا۔

اسپنر نے آخری مرتبہ دورہ بنگہ دیش میں ٹی ٹوئنٹی میچ میں پاکستان کی نمائندگی کی تھی جہاں انہوں نے بنگہ دیش کے خلاف 3.2 اوورز میں 25 رنز دیے تھے اور کوئی وکٹ لینے میں کامیاب نہیں ہو سکے تھے۔

انہوں نے بنگلہ دیش کے خلاف دو ایک روزہ میچ بھی کھیلے تھے لیکن اس میں بھی وہ متاچر کن کارکردگی دکھانے میں ناکام رہے اور 19.1 اوورز میں ایک وکٹ لے کر 123 رنز دیے تھے۔

اسپنر کی مایوس کن کارکردگی کا سلسلہ انگلش کاؤنٹی اور پاکستان کے ڈومیسٹک ٹی ٹوئنٹی ٹورنامنٹ میں بھی جاری رہا لیکن وہ اب بھی نئے ایکشن کے ساتھ فارم کی بحالی اور قومی ٹیم میں دوبارہ جگہ بنانے کیلئے پرعزم ہیں۔