لاہور میں سی آئی اے پولیس کی کارروائی، 3 دہشت گرد ہلاک

لاہور: باٹا پور میں سی آئی اے پولیس سے مقابلے میں 3 دہشتگرد ہلاک ہوگئے جب کہ ان کے قبضے سے خود کش جیکٹیں اور بارودی مواد بھی برآمد کیا گیا۔

پولیس کے مطابق دہشت گردوں کو نشاندہی کے لیے جب بی آر بی کے علاقے میں لایا گیا تو ان کے ساتھیوں نے دہشت گردوں کو چھڑانے کے لیے حملہ کردیا اور پولیس وین پر فائرنگ کردی جس کے بعد علاقے میں پولیس کی بھاری نفری کو طلب کیا گیا۔ پولیس کا کہنا ہے کہ دہشت گردوں سے فائرنگ کا تبادلہ کافی دیر جاری رہا جس کے بعد پولیس کی جوابی فائرنگ میں 3 دہشت گرد مارے گئے جب کہ دہشت گردوں کی فائرنگ سے سب انسپکٹر مقصود حیات بھی زخمی ہوگئے۔

پولیس کےمطابق ہلاک دہشت گردوں کی شناخت ثنااللہ عرف حسین پنجابی، عمران عرف امیر اور شیخ قانون کے نام سے ہوئی اور ان کے قبضے سے 2 خودکش جیکٹس اور بارودی مواد برآمد کیا گیا جب کہ دہشت گردوں کی نشاندہی پر واہگہ بارڈر کےقریب سے 4 ہینڈ گرینیڈ بھی برآمد کیے گئے۔