’ٹیم میں جیت کا جنون ہے‘، وہاب ریاض

سٹار فاسٹ باؤلر وہاب ریاض کا کہنا ہے کہ پاکستانی کرکٹ ٹیم میں جیت کا جوش و جنون پیدا ہو چکا ہے اور ہر کھلاڑی کامیابی کے لیے جی جان لڑا رہا ہے۔ یہ باتیں اُنہوں نے ایک خصوصی انٹرویو میں کہی ہیں۔

اُنہوں نے کہا کہ سری لنکا کے ساتھ سیریز شروع ہونے سے پہلے سب کھلاڑیوں نے جیت کا تہیہ کیا تھا اور یہ کہ ون ڈے اور ٹیسٹ سیریز میں فتوحات ٹیم ورک کا نتیجہ ہیں۔ جمعہ کو لاہور میں ڈوئچے ویلے کو انٹرویو دیتے ہوئے وہاب ریاض کا کہنا تھا کہ انہیں زخمی ہوکر سری لنکا کا دورہ ادھورا چھوڑنے کا جتنا افسوس تھا، اب ٹیم کے سرخرو ہونے کی اتنی ہی خوشی بھی ہے۔

انہوں نے کہا کہ پاکستانی ٹیم کا تشکیل نو کے مرحلے میں کامیابیاں سمیٹنا خوش آئند ہے:’’ہرکھلاڑی اپنی ذات سے بالاتر ہو کر صرف ٹیم کے لیے کھیل رہا ہے۔ شعیب ملک کا تجربہ بھی کام آیا۔‘‘

واضح رہے کہ وہاب ریاض سری لنکا کے خلاف دوسرے ٹیسٹ میں بیٹنگ کرتے ہوئے دشمانتھا چمیرا کی گیند لگنے سے زخمی ہو گئے تھے۔

وہاب جو تین ہفتے قبل اپنی تیسویں سالگرہ منا چکے ہیں، عالمی کپ میں شین واٹسن کے خلاف اسپیل کو اپنے کیریئر کا اہم سنگ میل قرار دیتے ہیں اور کہتے ہیں کہ مجھے ایڈیلیڈ کوارٹر فائنل میں اپنی باؤلنگ کی اصل قوت کا اندازہ ہوا:’’اُس روز ایڈیلیڈ میں مَیں اپنے آپ کو جان گیا۔ میں کیا کر سکتا ہوں۔ آسٹریلیا میں ملنے والی پزیرائی نے بھی مجھے اعتماد سے مالا مال کر دیا۔ گیند کس جگہ گرا کر بیٹسمین کو چلتا کرنا ہے، یہ ہنر بھی مجھے اسی دن ہاتھ لگا۔‘‘

گز شتہ ایک سال میں اٹھاون انٹرنیشل وکٹیں لے کر وہاب پاکستانی باؤلنگ لیڈر بن کر ابھرے ہیں لیکن وہ کہتے ہیں کہ ابھی میرے کیریئر کا جوبن آنا باقی ہے۔ وہاب کے بقول ان کی خواہش ہے کہ جب وہ کرکٹ کو خیر باد کہیں تو لوگ انہیں بھی عمران خان، وسیم، وقار اور شعیب اختر کی صف میں شمار کریں:’’میں انہی کی طرح کا میچ ونر بننے کے لیے بلاناغہ سخت فزیکل ٹریننگ کرتا ہوں۔‘‘

پاکستان کرکٹ میں فاسٹ باؤلرز کا دور واپس آنے کا سہرا وہاب ریاض نے کوچ وقار یونس کے سر باندھا اور کہا کہ سعید اجمل اور شاہد آفریدی کے جانے کے بعد وقار اور مشتاق نے فاسٹ باؤلرز میں ذمہ داری کا احساس اجاگر کیا کہ ٹیم اب اسپنرز پر مزید انحصار نہیں کر سکتی:’’خلیج کی اسپن پچز پر بھی مسلسل ہوم سیریز کھیلنے سے فاسٹ باؤلرز پس منظر میں چلے گئے تھے۔کوچ کی محنت اب رنگ لا رہی ہے۔‘‘