بین ایفلک اور جینیفر گارنر کی طلاق

ہالی وڈ جوڑے بین ایفلک اور جینیفر گارنر نے اعلان کیا ہے کہ انھوں نے اذدواجی بندھن ختم کرتے ہوئے ’طلاق کا ایک مشکل فیصلہ کیا ہے۔‘

اداکار بین ایفلک اور اداکارہ جینیفر گارنر کی سنہ 2005 میں شادی ہوئی تھی اور ان کی تین اور نو سال کے درمیان تین بچے ہیں۔

انھوں نے ایک بیان میں کہا ہے: ’ہم ایک دوسرے کے لیے دوستی اور محبت قائم رکھتے ہوئے یہ قدم اٹھارہے ہیں اور اپنے بچوں کی مشرکہ طور پر پرورش کریں گے۔‘

42 سالہ بین ایفلک اپنی آنے والی فلم ’بیٹ مین ورسز سپرمین‘ میں بیٹ مین کا کردار ادا کر رہے ہیں جبکہ جینیفر گارنر بھی ہالی وڈ کی معروف اداکارہ ہیں۔

بین ایفلک نے بطور اداکار اور ہدایت کار دونوں شعبوں میں کامیابیاں حاصل کی ہیں۔ انھوں نے سنہ 1997 میں ’گڈ ول ہنٹنگ‘ کے سکرین پلے پر آسکر ایوارڈ حاصل کیا تھا، ان کو دوسرا آسکر ایوارڈ سنہ2013 میں فلم ’آرگو‘ پر ملا جس میں انھوں نے اداکاری کے ساتھ ساتھ ہدایت کاری کے جوہر بھی دکھائے تھے۔

جینیفر گارنر کو بھی ٹی وی سیریز ’ایلیاس‘ میں سی آئی اے ایجنٹ کے کردار پر گولڈن گلوب ایوارڈ مل چکا ہے۔

اس فلمی جوڑے کے قریبی ذرائع کا کہنا ہے کہ طلاق کا فیصلہ دوستانہ ماحول میں کیا گیا ہے۔