بلی نے عورت کو کاٹ لیا، عورت نے بلی کے مالک کو

جرمنی کے مغربی شہر ہاگن میں ایک نوجوان عورت کو اس کے بوائے فرینڈ کے گھر پر اسی کی بلی نے اتنے زور سے کاٹا کہ خاتون نے انتہائی مشتعل حالت میں پہلے بار بار بلی کے مالک کو کاٹا اور پھر اتنی پٹائی کی کہ اسے ہسپتال جانا پڑا۔

جرمن دارالحکومت برلن سے اتوار اکیس جون کو ملنے والی نیوز ایجنسی اے ایف پی کی رپورٹوں کے مطابق پولیس نے آج بتایا کہ یہ واقعہ سب سے زیادہ آبادی والے جرمن صوبے نارتھ رائن ویسٹ فیلیا کے شہر ہاگن میں ہفتے کی صبح پیش آیا۔

ہاگن پولیس کے ایک ترجمان کی طرف سے جاری کردہ ایک بیان میں کہا گیا ہے کہ یہ خاتون اور اس کا دوست، جن کے نام ظاہر نہیں کیے گئے، ایک فلیٹ میں اکٹھے رہتے تھے۔ ہفتہ بیس جون کی صبح جب 26 سالہ خاتون نے اپنے 39 سالہ دوست کی بلی کی پالتو جانور کے طور پر تربیت کی کوشش کی تو بلی نے جھنجھلا کر اس خاتون کو کاٹ لیا۔

اس پر خاتون نے طیش میں آ کر بلی کو ’طور طریقے‘ سکھانے کی کوشش کی تو اس کا اپنے بوائے فرینڈ اور بلی کے مالک کی طرف سے مداخلت پر اس کے ساتھ جھگڑا شروع ہو گیا۔ تب یہ خاتون مبینہ طور پر اتنی مشتعل تھی کہ اس نے بلی کے کاٹنے کا بدلہ لینے کے لیے کئی بار اپنے بوائے فرینڈ کو کاٹ لیا۔ اس دوران خاتون نے اپنے دوست کو پیٹا بھی جبکہ وہ خود کو بچانے کی کوشش کرتا رہا۔

ہاگن پولیس کے بیان میں کہا گیا ہے، ’’اس آدمی نے، جو بار بار کاٹ لیے اور پیٹے جانے کے باعث زخمی ہو گیا تھا، کئی بار پولیس کو فون کرنے کی کوشش کی لیکن ہر بار خاتون نے اس کے ہاتھ سے فون چھین لیا۔ پھر یہ آدمی کسی طرح گھر سے فرار ہونے میں کامیاب ہوا تو اس نے پولیس کو فون کیا۔‘‘

جب پولیس موقع پر پہنچی تو آدمی کو پہلے ہسپتال لے جایا گیا جہاں اس کے زخموں کی مرہم پٹی کر دی گئی۔ بیان کے مطابق خاتون کے خلاف ’گھریلو تشدد‘ کے الزام میں مقدمہ درج کر لیا گیا ہے اور فوری طور پر اس کے اگلے دس دنوں تک کے لیے اپنے بوائے فرینڈ کے گھر میں داخلے پر پابندی لگا دی گئی ہے۔

اس خاتون کو کوئی جرمانہ کیا جائے گا یا کوئی دوسری سزا سنائی جائے گی، اس کا فیصلہ تشدد کے اس مقدمے کی عدالتی کارروائی کی تکمیل پر ہی ہو سکے گا۔